Gazelin tamâmı şöyle:
Kimseyi dil-teng-i âzâr etme sultânlık budur
Kalb-i mûri taht-gâh eyle Süleymanlık budur
Zîb-i gûş et her kemâlin bir zevâli olduğun
Mihr isen de zerre ol hurşîd-i rahşânlık budur
Her dü-çeşmin ki dür-efşân eyleyip geh lâl-rîz
Hande eyle zîr-i lebden ebre giryânlık budur
Dâğ-ı reşk-i mihr-i mahşer kıl şerâr-ı âhını
Tâb u sûz-ı aşk ile yan sîne-sûzanlık budur
Zülf-i yâri eyle vakf-ı pîç ü tâb-ı ıztırâb
Dil-perîşanlık budur âşüfte-sâmânlık budur
Gerçi her bir derde vardır bir tabîb-i çâre-sâz
Nabz-gîr-i kalb-i mahzûn ol ki Lokmanlık budur
Açma mahrem zannedip her şahsa râzın ey Nazîm
Bâd-ı sarsar gelse cûşân olma ummanlık budur
Fâ'ilâtün/ Fâ'ilâtün/ Fâ'ilâtün/ Fâ'ilün
