Lâzıkîzâde Feyzullah Nâfiz'in (öl. miladi 1767) 163 numaralı gazeli. Hiclal Demir, Kültür ve Turizm Bak. Yay. e-kitap, s. 247-248.
Fâ'ilâtün Fâ'ilâtün Fâ'ilâtün Fâ'ilün
La'liñ emdir hikmetin sorma dil-i şeydâ bilir
Çekdiği derd [ü] cefâ-yı aşk[ı] bir Mevlâ bilir
Gamzeñ inkâr eylesin da'vâma şâhiddir müjeñ
Ey kemân-ebrû bize etdikleriñ dünyâ bilir
Ne alır nakd-i niyâzı ne eder bir pâre nâz
Yalvarıp yatma sen ol meh-pâreye simyâ bilir
Ne tutar dest-i recâyı ne verir câm-ı visâl
Sâkî ancak devr-i pey-der-peyle istiğnâ bilir
Nakş-ı âb-ı çâh-ı câhıñ resmine âgâh olan
Mevce-i 'ayn-ı serâb ile anı hem-câ bilir
Gerdiş-i ârâm-ı dünyâ böyle nakş-endâz iken
Anı niçe 'akl-ı kâmil kendine ibkâ bilir
Çeşm-i bahtıñ Nâfiziñ bîdâr olur ise bu şeb
Hâb-gâhını o yâriñ tolaşır tenhâ bilir
